阿仙奴「爭鋒」失敗 夏維斯做「假9」等破紀錄

2025年02月04日 17:03
東網電視
更多新聞短片
夏維斯(右)上場英超射入曼城大門。(Getty Images)
阿仙奴領隊阿迪達原本計劃冬季轉會市場簽入前鋒,頂替受傷長抖嘅加比爾捷西斯,曾經有6位目標人選,但轉會窗關閉,最終零收穫,意味需要由中場夏維斯擔任「假9」角色,頂埋下半季。
阿迪達收購名單上有阿士東維拉射手奧尼屈堅斯、RB萊比錫射手班捷文施斯高、祖雲達斯前鋒杜辛華荷域、巴黎聖日耳門射手高路梅安尼、保地花高新星伊高捷西斯,甚至想借用曼聯前鋒拉舒福特,但到轉會窗關閉,一個都簽唔到,「廠迷」難免失望。
幸好串客前鋒嘅夏維斯有不俗演出,近5次上陣入3球,包括上場英超射入曼城大門,呢位25歲德國國腳今季各項賽事上陣33場入15球,已過多上季總入球數字,亦係職業生涯單季第3多入波,僅次於效力利華古遜時期2018/19年球季入20球及2019/20年球季入18球,夏維斯今季餘下賽事繼續擔任前鋒,要打破單季最多入波紀錄指日可待。