邦尼菲斯見財化水 大打爭氣波反擊艾納斯
2025年02月04日 19:01
東網電視
更多新聞短片

邦尼菲斯(紅衫)入球效率高。(Getty Images)
沙特阿拉伯豪門艾納斯本來有意收購利華古遜前鋒邦尼菲斯,但最後改變主意簽入阿士東維拉射手祖漢杜蘭。呢位24歲尼日利亞國腳痛失「挖金」機會,立即大打氣波,上場德甲射入1球證明身價,利華古遜留住呢位射手,亦有助下半季爭標。
邦尼菲斯上季為利華古遜上陣34場入21球,佢上年11月受傷,導致缺陣近3個月,直至上場聯賽先至復出,相信係艾納斯放棄收購呢位1米90「長人」嘅主因。不過,邦尼菲斯用行動證明自己已完全克服傷患問題,上場德甲復出對賀芬咸,立即取得入球,今季聯賽11次披甲有7球進帳,保持高入球率。
利華古遜隊長哈迪基大讚邦尼菲斯專業:「每個人面對前途十字路口,總會有好多嘢諗,難免會分心,但邦尼菲斯好專業,清楚自己要點做,表現令人留下深刻印象,用入波幫助球隊。」隨住邦尼菲斯復出後迅速重拾狀態,大大提升利華古遜爭取衞冕德甲及德國盃本錢。