AC米蘭重槌出擊 簽入「北美核彈頭」

2025年02月04日 20:02
東網電視
更多新聞短片
辛迪亞高基文尼斯(左)同伊巴謙莫域(右)一齊睇AC米蘭上場對國際米蘭。
AC米蘭喺冬季轉會市場關閉前,有重要收穫,簽入荷甲勁旅飛燕諾射手辛迪亞高基文尼斯,轉會費為3,500萬歐元(約2.8億港元)。呢位23歲墨西哥國腳入球率高,被譽為自1999年「烏克蘭核彈頭」舒夫真高加盟以來,A米最重要鋒線收購。
AC米蘭缺乏可靠射手,加上已將西班牙前鋒艾華路莫拉達外借去土耳其球隊加拉塔沙雷,急需要簽入代替人選,所以重金買入辛迪亞高基文尼斯。呢位新星為飛燕諾總共上陣105場入65球,包括今季19次上陣入16球及3次助攻,佢加盟AC米蘭,獲得7號球衣,備受睇好可以成為另1位舒夫真高,大幅提升球隊攻力。
AC米蘭上場意甲對國際米蘭,辛迪亞高基文尼斯同球會顧問伊巴謙莫域一齊睇波,呢位瑞典神鋒可能已經過佢幾招,協助佢盡快適應意大利球壇比賽風格。
另外,A米隊長卡拿比亞同教練沙治奧干斯卡奧吵大鑊之後,被外借去博洛尼亞。