皇馬公開指控裁判系統舞弊 球證醞釀大罷工
2025年02月05日 08:01
東網電視
更多新聞短片

皇馬對西甲球證系統作出嚴重指控。
西甲大混亂!皇家馬德里周二(4日)發出公開信,指控西甲裁判系統「舞弊」,長期針對皇馬嘅判決達到「操控比賽」同「假波」程度,要求全面革新裁判體系。皇馬嘅嚴重控訴引起極大回響,據報部份球證不滿受到攻擊,計劃發起罷工行動,令西甲陷入停擺危機!
皇馬上場聯賽0比1輸畀愛斯賓奴,多個爭議判決都對皇馬不利,教練安察洛堤賽後已炮轟執法不能接受,皇馬周二更發表言詞激烈嘅公開信:「呢場波嘅醜聞再引起世界關注,全球譴責西甲VAR偏私同欠誠信嘅執法。」信中提到巴塞隆拿涉嫌賄賂前球證委員會高層嘅官司,要求足總改革呢個「舞弊球證系統」。
西班牙球證協會周一(3日)會議後,已將皇馬對愛斯賓奴嘅球證團隊停賽,不過皇馬今次公開信就引嚟好大反應,《Cadena Cope》報道唔少西甲球證非常不滿,計劃發起罷工行動,若果全體球證都同意就會立即執行,今個星期仲有一場有齊球會、足總同球證代表出席嘅會議,將會成為關鍵。
西班牙著名記者Isaac Fouto透露:「有部份西甲球證相信罷工係唯一回應,但前提係所有球證都要一齊行動,有一個Say No都唔成事,已經有球證表態加入,搞得成嘅話西甲將會暫停。」西班牙球證協會亦反駁皇馬:「我哋一直有檢討同分析球證工作,但唔容許外畀對佢哋誠信嘅質疑,咁樣只會損害西班牙足球。」