【官宣】曼聯外借馬拉西亞 有買斷條款
2025年02月05日 09:00
東網電視
更多新聞短片

馬拉西亞望重返荷甲發光。
曼聯清洗行動繼續,周三(4日)荷甲冬季轉會窗關閉前,曼聯宣布將左閘杜維爾馬拉西亞外借去燕豪芬,而且合約包含買斷條款,意味呢位25歲球星可能已經提早完結佢嘅「紅魔生涯」。
今次借用為期半季,燕豪芬會承擔全部人工,如果啱用嘅話,燕豪芬有權喺夏天用1,000萬歐元將佢「買斷」,消息指曼聯仲有得到約30%嘅「二次轉會」分成。
馬拉西亞簽約燕豪芬後表示:「我開心嚟到呢度,再次踢好波,我經歷完長期傷患,但依家狀態好好,我嘅時間終於嚟到,希望可以幫燕豪芬贏更多冠軍。」
馬拉西亞喺2022年由飛燕諾轉會曼聯,不過長期受傷令發展停滯,喺魯賓艾摩廉領軍下曾8次上陣,隨住曼聯簽入左翼衞多古,馬拉西亞已成為多餘一員。