巴塞懵盛盛　垃圾轉會操作唔見9,700萬

曼城喺冬季轉會窗最後關頭，用5,000萬鎊收購波圖中場尼高干沙利斯，原本呢位拉馬西亞青訓產品轉會，可以為巴塞隆拿帶嚟巨額分帳，不過呢支西甲班霸就懵盛盛，白白唔見超過1,000萬鎊(約9,700萬港元)收入。

巴塞2年前將尼高干沙利斯賣畀波圖，合約有2,500萬鎊(約2.4億港元)回購條款，亦有高達40%嘅「二次轉會」分成。當曼城提出收購，巴塞本來可以先啟動回購條款，再將佢高價賣畀曼城，點知波圖先下手為強，啟動合約另一條款，用250萬鎊(約2,500萬港元)買斷「回購權」，兼且令轉會分成由40%減至20%。

呢次操作之後，巴塞原本最強可以獲利2,500萬鎊，依家只係賺到1,000萬鎊(20%分成)加250萬鎊(波圖條款)。巴塞近年財政出現嚴重問題，依家有個發財機會擺喺面前又唔識把握，球會高層反應遲鈍被球迷鬧爆。