泰爾轉軚答應加盟熱刺　全靠哈利卡尼幫口

熱刺喺冬季轉會窗最後關頭，成功游說法國翼鋒馬菲斯泰爾加盟，令球迷非常振奮。據報泰爾本身對熱刺全無興趣，不過哈利卡尼落足嘴頭，成功令泰爾改變主意，哈利卡尼離隊後仍然做熱刺「功臣」。

19歲新星泰爾決定離開拜仁後，傳聞曼聯、阿仙奴同熱刺都對佢有興趣，熱刺率先出手同拜仁達成協議，但泰爾最初拒絕，表明寧願留隊到夏天都唔想去熱刺，估唔到喺「死線日」突然轉軚答應加盟。

據報拜仁王牌前鋒哈利卡尼，為舊東家熱刺充當說客立功，泰爾轉會後透露：「哈利卡尼同我講熱刺係大球會，出過好多勁人，球場好正，又有靚訓練場，所有嘢都好正面，我一定會好享受。熱刺係我面前最好嘅方案，最重要係畀到我成長空間。」