「小雲」做逃兵照寸嘴　15比0手勢挑釁馬體會

皇家馬德里喺歐聯16強淘汰馬德里體育會，巴西前鋒雲尼斯奧斯祖利亞喺法定時間12碼宴客，幾乎成為罪人。皇馬教練安察洛堤爆料，話「小雲」表明唔想喺互射12碼再操刀，不過做「逃兵」嘅佢依舊惹火，向馬體會球迷做出15比0手勢挑釁。

皇馬喺70分鐘本來有機會贏波，但雲尼斯奧斯主踢12碼射到9樓咁高，去到加時尾段更主動要求被換走，一直被馬體會球迷狂噓嘅佢，就做出15比0手勢，寓意皇馬係15屆歐聯冠軍，而馬體會就從未贏過歐聯。

對於「小雲」喺互射12碼前被換走，安察洛堤賽後表示：「佢唔想負責12碼，而且覺得好疲倦，所以要求我換走佢。」講到決定性嘅第5個12碼由魯迪格操刀，安帥表示：「我哋喺魯迪格同安迪歷之間選擇，魯迪格表現得更冷靜，而我睇唔到安迪歷準備好或者好想去射，所以就揀咗魯迪格。」