冇運！阿諾特「又」無緣英聯盃決賽

利物浦喺歐聯16強出局，右閘阿歷山大阿諾特更喺對巴黎聖日耳門一戰傷出，據英國《每日郵報》報道，呢位英格蘭國腳雖然逃過嚴重受傷，但亦肯定無緣踢嚟緊場英聯盃決賽，連續2年錯過呢項賽事決賽。

阿諾特上場足踝扭傷，膝頭亦受牽連，一度有傳佢可能提早收咧，不過《每日郵報》指經過初步檢查，發現佢傷勢唔算太嚴重，有望喺球季完結前出返，但周一(17日)凌晨對紐卡素場英聯盃決賽肯定唔踢得，考慮到干拿巴特利同祖高美斯依家都有傷，決賽可能要用昆沙做右閘。

利物浦上屆英聯盃決賽擊敗車路士捧盃，阿諾特同樣因傷缺陣，似乎冇乜「英聯盃命」。除利物浦之外，英格蘭領隊杜曹即將公布首份大軍名單，阿諾特原本肯定入圍，但依家就殺杜曹一個措手不及。