熱刺反勝阿爾克馬爾晉級　加演爭射罰球鬧劇

周五(14日)凌晨歐霸盃16強次回合，熱刺主場成功收復首回合輸0比1失地，主場3比1擊敗阿爾克馬爾，兩回合合計贏3比2晉級，8強將會面德甲嘅法蘭克福對撼。熱刺今場雖然贏波，但就發生占士麥迪臣同柏度樸路爭射罰球鬧劇，要隊長孫興民調停。

熱刺攻勢凌厲，26分鐘就由威爾遜奧度拔入波，總比數追平。完半場前熱刺喺危險地帶獲得罰球，占士麥迪臣拎住個波準備處理，突然柏度樸路走上嚟爭射，雙方出現爭拗，孫興民即介入被推開柏度樸路，最終按計劃由占士麥迪臣處理。

熱刺喺48分鐘就由孫興民助攻占士麥迪臣入波，「老孫」喺74分鐘再策動反擊，由威爾遜奧度拔再入1球，最終喺總比數一度落球2球下反勝3比2。熱刺領隊普斯迪高路賽後表示：「我哋進步好多，呢一點先係最重要，球員喺落後之下都好冷靜，並且射入精彩嘅入球。」