莫迪歷做班主！正式入股史雲斯

皇家馬德里中場莫迪歷榮升班主！39歲嘅克羅地亞傳奇莫迪歷周一(14日)宣布，佢已入股英冠球隊史雲斯，成為呢間威爾斯球會嘅聯合班主之一，不過今次投資唔會影響佢嘅足球事業，莫迪歷仍然希望繼續留效皇馬。

史雲斯上年11月被高漢等多名商人組成財團收購，估唔到莫迪歷亦有興趣加入，莫迪歷喺聲明中表示：「呢個係令人興奮嘅機會，史雲斯係有名氣嘅球會，有非常之多嘅球迷，而且有喺頂級賽事比賽嘅雄心，我相信我嘅經驗可以幫到球隊，我嘅目標係支持球隊壯大，打造令人興奮嘅未來！」

史雲斯行政總裁高寧治亦表示：「無人比莫迪歷更適合做史雲斯球員嘅模範，佢對球會雄心嘅肯定，以及對史雲斯嘅支持，將會係我哋球場內外實現目標嘅重要因素。」報道未透露莫迪歷嘅投資金額，但呢位中場未打算做「全職老闆」，佢仍然希望同皇馬續約，下季繼續以球員身份比賽。