唔信邪！曼聯有意簽「黑仔王」蘭斯達爾

曼聯自從放走傳奇門神迪基亞後，門將位置就淪為笑柄，正選奧拿拿同後備比恩迪亞輪流派膠，領隊魯賓艾摩廉已準備夏天「換龍」。據英國《每日郵報》報道，曼聯睇中修咸頓嘅蘭斯達爾，呢位英格蘭國腳近6年3次降班，被稱為「黑仔王」。

奧拿拿近年犯錯頻頻，歐霸盃連環犯錯後，最近終於被魯賓艾摩廉收起「冷靜吓」，據報佢夏天幾乎肯定會被賣走，而曼聯就睇中將會降班嘅修咸頓門將蘭斯達爾。修咸頓降班後需要賣人，預計佢哋只要收返「成本價」2,500萬鎊就會放人。

26歲嘅蘭斯達爾正處當打之齡，亦係英格蘭國家隊成員，反應同身手都有一定水準，不過佢嘅運氣就麻麻地，出道後分別喺般尼茅夫、錫菲聯同修咸頓經歷英超降班惡夢，曼聯依家排第14位「護級成功」，下季踢成點難以預料。