皇馬訓練爆衝突　比寧咸同魯迪格幾乎開拖

皇家馬德里備戰歐聯8強次回合對阿仙奴，希望收復首回合輸0比3嘅劣勢，賽前氣氛似乎相當緊張，據報喺賽前一課操練期間，祖迪比寧咸同魯迪格出現火爆衝突，幾乎「講手」，要隊友將佢哋拉開。

據西班牙媒體《El Chiringuito》報道，皇馬日前練習出現不愉快事件，起因係魯迪格嘅一次攔截太狼死，比寧咸即刻扯火鬧爆，兩人就互相出言侮辱對方，而且愈鬧就愈大聲，好在喺兩人出拳前，一班隊友及時拉開兩人。

現場記者艾古爾透露：「當時氣氛好緊張，佢哋爆衝突後一直互鬧，要其他隊友加入先至壓得住，佢哋最後都有握手，但就再次證明更衣室內嘅高壓同緊張情緒。」皇馬發言人亦指今次衝突只係「正常情況」，試圖淡化事件。