歐聯最強中堅　37歲老將「封殺」8大神鋒

正所謂家有一老、如有一寶！意甲班霸國際米蘭今季成績彪炳，歐聯11場只失3球嘅頂級防線係最大賣點，其中8強首回合凍結拜仁慕尼黑前鋒哈利卡尼嘅老將法蘭斯高阿沙比，今季已經「鎖死」過8大神鋒，將係國米衝冠嘅關鍵人物。

已經37歲嘅阿沙比今季有唔少時間休息，不過每次落場都交出頂級表現，5場歐聯踢380分鐘，竟然從未試過去對手扭過！首回合盯死哈利卡尼之外，喺聯賽階段亦曾成功「封殺」曼城嘅艾寧夏蘭特，加上意甲曾負責盯防盧卡古、域陀奧森漢、摩斯堅恩、基奧特、杜辛華荷域同列迪古，都冇被對方入過波。

阿沙比經驗豐富，亦知道要再次盯死哈利卡尼唔係易事：「哈利卡尼可能係世界最佳中鋒，佢已經30歲，拜仁仲用1億歐元簽佢就係證明。哈利卡尼勁唔係咩新鮮事，但拜仁唔單止佢一個勁前鋒，我哋要做好準備。」