卡斯米路有望獲續約　但必須答應一項條件

曼聯中場卡斯米路季尾愈戰愈勇，成為球隊打入歐霸盃決賽嘅功臣，根據英國《太陽報》爆料，紅魔鬼打算同呢位33歲巴西老將續約，但前提係佢必須減人工。

卡斯米路喺歐霸盃4強兩回合對畢爾包，都有波入，表現非常出色，佢將於明夏約滿，據悉紅魔鬼會方已經改變主意，由原本準備出售呢位防中，變成想同佢續約。卡斯米路現時周薪高達35萬鎊(約350萬港元)，如曼聯捧今屆歐霸盃，獲得下屆歐聯入場券，根據合約，佢仲會加薪25%，對於球會造成沉重財政負擔。

因此，曼聯管理層希望以續約，畀卡斯米路留隊至掛靴，換取佢接受減薪一半，至於卡斯米路肯唔肯接受，仍然有待雙方商討。