陳鈺芸收「綠石」做煞科禮物

武打女星陳鈺芸 （JuJu）日前飛抵新西蘭，拍攝荷里活電影《臥虎藏龍2》。她與導演袁和平、監製、演員如原麗淇及岑勇康等於當地出席電影煞科宴。至於主演電影的甄子丹及楊紫瓊則分別趕赴倫敦電影節及到南非拍攝美國劇集而缺席。

JuJu透過電話訪問大爆煞科宴「美食如雲」，而劇組更花盡心思為眾演員送上別緻的煞科禮物。她說：「新西蘭流行送綠石項鍊畀訪客，所以監製就挑選咗畀每個演員，仲準備埋寫滿好多祝福語嘅心意卡。卡上面話我係個勇士，認真又捱得！我好鐘意呢份特別禮物，因為粒石代表到我嘅性格！」

JuJu笑言於當地「好食好住」，故增磅不少的她未敢於席上「狂擦」美食：「當日以意、法式菜為主，我淨係敢食魚同菜。因為去咗新西蘭四個月，足足肥咗十幾磅！」

她又大爆導演袁和平鍾情中餐，故她特意向對方送上自家書藉《點菜英文》，教導經常身處異地拍戲的對方亦能輕鬆享受西餐：「袁導演鍾意食中菜，佢嘅晚餐多數以中餐為主，佢仲逢星期六、日都會去飲茶。而劇組有時仲會為中國人準備中餐添！所以我送我本書畀佢，裏面有用唔同語言點菜嘅技巧同貼士，等佢可以多個選擇試吓其他菜式。佢收到本書後恭喜我新書三度再版，仲讚我本書好實用，超開心！」