斥五百萬谷囝囝入名校？陳豪：好頭痛！

藝人陳豪（阿Mo）在將軍澳出席無綫劇《完美叛侶》之「『信』者得愛」活動。談到有指阿Mo與老婆陳茵媺不惜以五百萬港元購入國際學校的資本證券，為囝囝拎定K1入場券，他表示現階段仍然搵緊學校：「未決定係本地定國際學校，為呢樣嘢頭痛緊！好多學校都睇過，好多都好唔錯，所以仲係磋商階段。」

陳豪承認有參觀過該國際學校，問到是否唔啱心水？他雖然否認，但不作特別評價：「因為咁樣對小朋友唔公平，依家可以話係Open心態搵，有三個仔女就要更加搵好嘅教育制度。」他又謂每一步都要與老婆認真商量，亦會親身了解各個學校。

否認老婆出山幫補學習

問到老婆是否要復出拍戲幫補學費，他坦言這是男人所要肩負的責任，又謂老婆對演藝有熱誠：「如果佢唔演戲係觀眾損失！」