媽媽放假？安志杰做湊女公囡囡嘴扁扁

最近喺《城寨英雄》中飾演最強保鏢「龍成虎」，因而人氣急升的伍允龍，同安志杰（Andy）好老友，無論喺美國定喺香港，佢哋都會相約見面，尋晚伍允龍上載兩張相到ig，見安志杰帶埋5個月大嘅囡囡Tessa出嚟，佢將囡囡揹喺前面，唔知係咪唔見咗媽媽Jessica C.（JC），佢嘴扁扁咁，真係慘慘豬。

後來伍允龍同Andy會合兩名友人聚會，一行人仲影番張合照，而呢張相見到Tessa換咗頭上嘅髮帶，變咗個大蝴蝶結，睇嚟爸爸Andy都好細心，同囡囡準備咗兩條髮帶扮靚靚，JC可以放心啦！