港超聯　首次倒戈　林嘉緯：好特別嘅感覺

港超聯「追月大戰」傑志對東方龍獅最終以1比1打成平手，其中效力傑志已10年的林嘉緯迎來倒戈一戰。「嘉緯」今場代表東方龍獅正選上陣兼踢足90分鐘，賽後他表示感覺新奇：「今場自己好集中，有種好特別嘅感覺，有機會攞到罰球，望個龍門係王振鵬，可以同以往咁多年嘅傑志隊友正面交鋒，感覺幾特別。今年去到依家自己好滿足，有啲人喺我轉會之前講：『你今季去到東方都未必有正選喎。』依家好開心今季東方想建立嘅踢法其實好適合我，我希望可以一路努力，為球會、為自己爭番啲嘢。」

球隊憑著洛迪古斯的入球先開紀錄，卻在比賽末段被舊東家的新援泰迪破網追和，問及今場比賽戰果，他認為合理：「自己一路好期待呢場波，今季選擇離開傑志，正如之前所講，希望搵個新挑戰畀自己。今日球隊發揮算OK，當然傑志係支有經驗嘅球隊，都知道佢哋尾嗰20至30分鐘好強，佢哋有能力入波，最後和波雖然唔抵，但係睇番成個過程都覺得合理。」

連同上場對富力R＆F，「嘉緯」已連續兩場踢足90分鐘。今仗港隊新主帥加利韋特亦有入場觀戰，明日（26日）將公布任內首張初選名單，這位港隊「老臣子」期望年輕球員能得到機會：「平常心喇，當然入選係開心嘅，證明自己開季兩場波都表現得唔錯。自己真心希望可以見到多啲年青球員踢香港隊，特別係啱啱亞運合作完嗰班，呢個年紀我覺得真係要多啲實戰經驗畀佢哋發揮。如果我入選我會為自己開心，但係如果我見到好多新嘅球員入到去、接到班，其實自己更加開心。」