東網電視
更多新聞短片
維拉冬季增兵後火力大增。(Getty Images)
阿士東維拉喺冬季轉會窗大事增兵，由巴黎聖日耳門(PSG)借用嘅馬高阿辛斯奧極搶鏡，周四(13日)凌晨歐聯16強次回合，阿辛斯奧後備上陣梅開二度，帶領維拉主場3比0贏布魯日，兩回合合計大勝6比1晉級，8強將會硬撼啱啱淘汰利物浦嘅PSG。
維拉首回合領先3比1，對手今場17分鐘再有基利安尼沙比食紅牌，打多個嘅維拉半場換入阿辛斯奧，呢位西班牙前鋒即梅開二度，加上伊恩馬臣都入1球，主場3比0大勝而回，其中阿辛斯奧兩個回合入3球，成為晉級最大功臣。
維拉8強會面對PSG，雖然阿辛斯奧係由PSG借用，不過歐聯被冇禁止借將倒戈條例，甚至列明球會唔可以用任何方式向對方用人施壓。除阿辛斯奧外，維拉領隊艾美利都喺2016年至18年間執教PSG，呢位西班牙主帥表示：「非常特別，自從離開PSG後我都冇返過去，今次重返巴黎對壘令人興奮，我哋好有決心。」
