東網電視
更多新聞短片
多蒙特兩回合贏3比2晉級。(Getty Images)
德甲勁旅多蒙特喺周四(13日)凌晨歐聯16強次回合，作客2比1反勝里爾，兩回合總比數贏3比2晉級8強，不過「蜜蜂兵團」下一圈要對住巴塞隆拿，教練費歷克更加係多蒙特剋星，想入4強難度頗高。
首回合踢成1比1，里爾今仗藉主場威勢先發制人，5分鐘就由約拿芬大衞入波領先。多蒙特下半場發力，54分鐘由安利簡恩12碼追平，射手麥斯比亞65分鐘勁射建功，帶領多蒙特反勝晉級。
多蒙特8強會對巴塞隆拿，兩隊近5次對賽巴塞3勝2和未輸過，今屆聯賽階段巴塞就曾作客贏3比2。另外，巴塞教練費歷克以往執教拜仁慕尼黑，6次對住多蒙特全部贏晒，「蜜蜂兵團」似乎冇乜運行。
