东网电视
更多新闻短片

近日城中热话,莫过于网红小三“五索”自爆被富商包养,又真空出席饭局,又一晚十次,网民好似追连续剧咁, 日日等爆料。好嘢梗系唔好畀佢停,邓兆尊亦唔执输,同吴家乐主持网上节目语出惊人, 大爆有女星同时与6个富商交往并怀孕,唔知经手人是谁, 于是一网打尽,向每个富商摊牌索要掩口费,结果如愿每人收一球,总共袋咗六球!
哗,呢单嘢嘅Juicy程度, 比五索有过之而无不及,难怪全城上下化身柯南,猜猜她是谁。邓兆尊强调该女星同佢同期,曾与吴家乐拍剧,并非港姐出身,未婚但有小孩,多拍古装及身材Fit爆,而且中港两边走,于是多个名字皆打入嫌疑榜,包括杨思琦同陈彦行, 甚至连淡出娱乐圈嘅张慧仪都有份,可谓躺着也中枪。
之不过,行姐去年先至被爆诞女,男友并非甚么阔佬,邓兆尊亦扬言行姐冇咁醒而否认;思琦妹大女系同空心老倌吴帅所出,细仔生父身份神秘,但既然讲明并非港姐,当然亦唔系思琦妹啦。至于张慧仪,似乎好多条件都脗合,但佢儿子只系养子,亦从来无被人目睹大肚。
相信爆料到此为止,之但系网民就觉得,五索事件由御妻有术、大享齐人之福嘅兆尊分析,相当有说服力。你知啦,十个男人九个滚,剩番一个仲谂紧。五索忽然毁灭式爆料,点会冇原因吖。
呢位齐人怀疑,有人被富商冷落兼Cut生活费,所以先至爆大镬,企图获得大笔掩口费。又分析指,虽然女方有四个细路,但未必全由富商所出。嗱,呢啲嘢,真系过来人先至谂到,点到你唔服!

五索自爆被包养成为城中热话,邓兆尊亦加把口讨论。