东网电视
更多新闻短片
TVB《中年好声音3》仍在播放，未知冠军谁属，但一班过气中1生、中2生就频频爆出状况，话系乌烟瘴气都冇夸张。呢，最新一个出事，就系中2生兼季军颜米羔。条友仔被指借钱唔还，直到债主出Po先至赶忙还钱，真系唔闹唔松化。
事缘有债主喺Threads爆料，晒出多张与颜米羔私讯嘅对话截图，指2022年颜米羔向他借钱一直唔还，去年6月透过WhatsApp问几时找数，颜米羔先系一轮嘴诉苦，声称“由上年到而家都无工作收入”，“比赛完到而家都未收到公司一蚊粮”，其后答应“尽快Settle”，结果去如黄鹤。债主去年11月再追多次，颜米羔覆都唔覆，逼得债主日前喺Threads公开事件。
欠债曝光后，颜米羔果然有反应速速找数，但就埋怨债主咁做对佢伤害好大，仲话自己只系表面风光。而所涉债项，原来只系区区2.5万元。吓，咁都要拖几年，唔系啩？若然债主唔公开追债，究竟会唔会还钱，真系疑问。
点都好，事件总算解决，之但系中1生、中2生接连出事，令节目形象受损却系不争嘅事实。嗱，欠债点止颜米羔吖，好似梁浩铨，就曾被债主公开追债80万元，之后仲被踢爆债主唔止一个，而系一群。
不伦出轨嘅传闻更系数之不尽。例如已婚嘅曹敏宝被指跟梁浩铨有染，又如孙耀威已婚胞妹孙美贤被指包养郑梓浩，郑梓浩甚至同时有小三、小四，刷新人们三观。至于最经典嘅，莫过于龙婷嘅“Hello Kiss”事件。所以话啫，中年追梦系就系好励志，但暗地里搞边科，唔到出事嗰刻都冇人知！
颜米羔（左起）、郑梓浩、龙婷。
