东网电视
更多新闻短片
哗，好型啊！讲紧边个呀？之唔系荷里活型佬毕彼特啰。佢老哥近年除咗离婚消息层出不穷，喺电影方面嘅成绩可谓乏善可陈。之但系，最近电影公司释出佢主演嘅最新电影《F1》海报及预告，整个舆论扭转，喂，真系乖乖不得了，型到震呀！
叫得《F1》，梗系讲赛车啦。毕佬饰演叱咤一时嘅退役车手，受老板邀请出山指导天才新人，因而重踏赛场。有冇觉得成个故事架构熟口熟面呀？冇错啦，同另一靓佬汤告鲁斯主演嘅《壮志凌云：独行侠》非常类似，又系讲述男主角宝刀未老，新一代冇佢搞唔掂咁啦。事实上，两套戏都系同一导演，既然靓佬汤前作全球大收，毕佬用番同一条方程式，怕且冇死啩？
当然，斋睇电影海报，已觉毕佬非常吸引。脸上虽然有啲风霜痕迹，但身形Fit到漏油，一身肌肉仍然精壮，粉丝觉得佢同廿年前冇乜分别，绝非夸张。不过咁，今时今日电脑特技进步，AI更系无所不能，系咪搵电脑执过，自行判断。
正如《壮志凌云：独行侠》获美军借出真实战机拍摄，《F1》亦以追求真实性为卖点，喺真实一级方程式大奖赛嘅周末实景拍摄，令赛车迷更加期待。电影将于今年暑假上画，粉丝议论纷纷，证明唔少观众早就睇厌甚么复仇者联盟呀、美国队长呢类CG动画式电影。
所谓反璞归真，虽然现今冇一套电影系零电脑特效，但电影始终以人为本，用真情实感打动观众，先至系王道。然而，毕佬已经年过六旬不再年轻，依然备受期待，反映荷里活同港产片一样，面对青黄不接、新一代难以孭飞嘅困局。
毕彼特饰演宝刀未老的赛车手，有型有款。
