东网电视
更多新闻短片
刘颖镟（Tiffany）最近喺大台的新剧《夺命提示》火热开播，头两集已先“色”夺人，小背心加上超短热裤身材弗到漏，网民睇到哗哗声，连新科“视帝”张振朗都睇到失晒神，唔知返到屋企会唔会畀女朋友杨偲泳罚顶痰罐兼扭耳仔？
无他嘅，Tiffany身高过170cm，42吋“长腿界天花板”逆晒天，加上连场香艳热舞兼凌空擘髀铰剪脚狂派福利，剧名“夺命提示”冇改错，心血少啲都畀佢攞命，难怪连登仔虽然道德L上身话“身材好都唔使刻意着到咁”，转头咪又忍唔住Cap片Cap图珍藏一再回味。
提起Tiffany，大概系由《学是学非》开始为人认识，但嗰时一众“是非精”都着得一本正经，冇乜机会畀Tiffany发挥，多得《3日2夜》一幕经典土耳其浸浴，直接升呢做女神。
难得Tiffany有姿色又有实际，众所周知仲系“好波”之人，呢嗱，早排佢出席篮球赛落场打波有板有眼，随便一射就入三分波，技惊四座，真系唔到你唔服。
不过对住女神，网民往往错重点，球技先按下不表，净系专注佢身上背心短裤，当发现佢控球上篮时疑似春光乍泄即如获至宝，可惜吖，当一众巴打惯性用两指扯大十倍一睇，原来里面系运动背心，惨过买六合彩“中空宝”。
查实Tiffany喺《万千星辉颁奖典礼2023》早已夺得“飞跃进步女艺员”，证明佢嘅努力已获大家认可，小妮子依然唔锡身搏晒命，唔单止操出“最强Body3.0”，仲要吊威吔做出高难度动作，以佢咁瞓身投入，相信要坐上最佳女主角王座都系指日可待！
刘颖镟在《夺命提示》性感上阵，之前拍《3日2夜》（左图）升呢女神。
