东网电视
更多新闻短片
近年日剧畀韩剧揿住嚟打，无他嘅，你睇几十年如一日，木村拓哉老是常出现，实在又几疲劳轰炸，与其睇大叔扮萌，不如睇佢细女光希模仿老窦Chok样好过啦，系咪？
但近排终于有套日剧杀出重围，就系由日本搞笑艺人兼鬼才编剧“笨蛋节奏”操刀嘅《小镇星热点》，成为Netflix关注组热话，成功为日剧救亡。套剧以富士山吉田市为背景，讲市川实日子饰演嘅单亲妈妈喺酒店做前台，发现同事角田晃广系外星人，之后佢同班三姑六婆闺蜜得寸进尺搵外星人过桥，闹出连场笑话。
除咗男女主角表现出色，一班配角都卧虎藏龙，最强嘅当然系陈年《头文字D》饰演周杰伦女友嗰位铃木杏，佢当年青春无敌、圈粉无数，但唔少网民话睇咗3集都未认得出佢。又难怪，佢剧中剪咗短发，容貌走晒样，何止“女大十八变”。
此外，国际级天后菊地凛子亦畀面客串，佢25岁时凭《巴别塔》一脱成名打入荷里活，连毕彼特都为之惊为天人，实力毋庸置疑，今次演女市长虽然戏份唔多，但气场十足。至于饰演地球人妈妈嘅安藤樱亦系影后专业户，之前套《100円的爱》赢尽口碑，连内地导演贾玲都翻拍成《热辣滚烫》，真系威到尽！仲有实力派型男池松壮亮饰演日版《慌张西望》电视台记者，佢早排仲嚟过香港出席亚洲电影大奖颁奖礼，睇到班女粉丝心心眼。
最爆系饰演偷电视清洁姨姨嘅野吕佳代，望落以为系大和谭仔阿姐，原来佢系前AKB48 Team K成员兼SDN48队长，真系估佢唔到。话时话，反正近排韩国节目除“金秀贤真人骚”一枝独秀，其他都冇乜亮点，如果睇腻咗贱男剧情，不妨转吓口味呢套暖心日剧，包你睇完下火兼消滞。
《小镇星热点》的铃木杏跟当年演《头文字D》的她实在判若两人！而野吕佳代（左1）曾是AKB48成员。
