东网电视
更多新闻短片
香港人热爱旅行，各大航空公司为咗争客，不时联同大小平台推出平价机票优惠，吸引消费者疯抢。嗱，大家都系打工仔，悭得一蚊得一蚊，机票梗系愈平愈好。之不过，估唔到“亿万千金”梁兆楹（Shirley）都会因为贪平而堕入骗局啫。
老公“亿万驸马”伍富桥早前发文，披露爱妻受骗经过，警惕世人小心上当。是咁的，Shirley近日赋闲在家，不停碌手机，畀佢睇到一个平价机票广告，9,500蚊一套商务舱机票，抵到烂。亿万千金不虞有诈，过数购买4套，涉款38,000蚊。结果等了又等，机票等唔到，只系等了个寂寞。
咁不幸嘅经历，大家都唔希望遇到，Shirley都预咗追唔番啲钱，当系买个教训，亦提醒网民便宜莫贪。难得佢哋两公婆咁睇得开，化负面为正面，希望执法部门见状会做嘢啦。话时话，经此一役先至知道，原来亿万千金都几贴地喎，一样会抢平价机票，同你我冇咩分别。咁当然，人家抢嘅系商务舱，我哋抢嘅系经济舱，始终都有唔同嘅，嘻嘻。
正所谓憎人富贵厌人贫，呢两公婆爱得高调，加上男女双方身家悬殊，一直备受网民谈论。口痕友甚至讥刺伍富桥食软饭，搞到Shirley曾发火撰文护夫，霸气扬言“佢×得落佢本事”，口痕友只好悻悻然收声。从此亦睇得出，Shirley真系好爱锡老公。
讲番今次诈骗事件，其实只系冰山一角，今时今日香港沦为诈骗之都，乜都有得呃，大家真系要小心啲。都系嗰句啦，世界上冇咁大只蛤乸随街跳，咪见到少少甜头，就伸条颈畀人锯吖。
伍富桥指富贵太太梁兆楹因抢购平价商务机票，而遇上诈骗。
