东网电视
更多新闻短片
嫁鸡随鸡，嫁狗随狗，嫁着一个拥抱者咯喎，做老婆嘅，惟有化身包容者啦，否则随时家衰口不停。呢，视后胡杏儿同老公李乘德结婚10年，仔仔都生咗3个，一家人不时高调放闪晒恩爱，但老公“拥抱者”本性难移，有时都令老婆几尴尬。
嗱，李乘德早前被传媒拍下夜店狂欢一幕，庆祝52岁牛一。之不过，狂欢一幕嘅女主角，并非老婆胡杏儿，而系一众性感囡囡，大家又揽又锡，如入无人之境。报道出街后，梗系惹来议论纷纷，李乘德事后喺IG以英文解画，声称“任何熟悉我的人都知道我是一个拥抱者”。吓，咁都得？
杏儿至今未有表态，继续如常工作，但老公同性感囡囡过从甚密，都唔系第一日嘅事。婚前已被指系沟女王，婚后更出现经典场面，当时李乘德出席饮宴，众女伴月坐埋一枱，殊不知杏儿忽然玩惊喜，从后杀出揽实老公。李乘德先系一脸愕然，知道老婆杀到兼有镜头对住，迅即变脸堆欢，被网民戏谑老婆突击检查，坏咗风流老公嘅好事！
今次又发生“拥抱者”事件，好事之徒都等睇好戏。日前细仔生日，李乘德喺IG出片出相为细仔庆生，但只见仔仔出镜，唔见杏儿踪影。于是乎又引来无限揣测，老婆大人啖气系咪仲未消呀？
计本栏话斋，杏儿见惯世面，清楚知道老公系个乜嘢人，就算嬲都系一时啫，点会嬲得耐吖。既然老公系拥抱者，咁老婆当然系个包容者。都老夫老妻啦，最紧要老公识返屋企啫。据闻杏儿不怪罪老公不特止，仲话要“缉凶”睇吓边个放料，似唔似经典港产片《大丈夫》剧情呀？
胡杏儿老公的“揽揽风波”，希望唔好影响小朋友。
