东网电视
更多新闻短片
中国恒大(03333)债务危机搞到满城风雨，就连前任恒大集团首席经济学家任泽平，亦被同行炮轰佢在职期间老点恒大创办人许家印，搞到恒大“爆煲”咁大镬。事隔大概半个月，呢位前军师终于忍唔住喺微信公众号发千字文“以正视听”，话一早已经进谏恒大，要降负债、唔好搞业务多元化，不过“该讲的都讲了”，只系冇人听入耳喎。
话说任泽平于2017年12月加盟恒大，入职冇几耐，恒大负债率已飙至86.25％，仲计划大举多元化扩张，见到咁既情况，佢当然要进谏啦，呼吁公司降负债，但未获采纳。不过佢“一向观点鲜明直接、个性耿直”，当住公司几位主要负责人的嘅面，直言国内外企业发展史上清楚写到明，“多元化大多失败”！
于是佢喺一次公司干部大会上大受批评，仲被批评好耐，大概系话佢“格局不够、认识不到公司重大战略”。呢件事对佢打击好大，但佢谂通咗，研究只能起辅助作用，唔可能越俎代庖代替决策者拍板。就算之后行业和金融监管从严，佢都只系提示风险。
佢亦话，公司总部喺深圳，但佢长年喺北京，一个月去深圳平均几日，“很多会议也参加不了，很多情况不了解”，完全谈不上系公司核心决策层，而佢最终因为“言不为用、难以融入”萌生去意。
已离职半年多、现时担任东吴证券首席经济学家嘅任泽平亦解释，之前冇就市场上嘅误解性言论回应，系因为恒大系前东家，唔想前东家陷入困境时，再引发舆论关注，但呢啲言论已对佢个人声誉造成影响。佢最后讲，希望恒大能走出困境，有个好结局。
内地一位“网红”经济学家刘胜军上个月发文，狠批恒大之所以咁激进，系受任泽平打鸡血式“忽悠”嘅影响。佢话，好似许家印咁大胆嘅企业家，缺嘅唔系胆量，而系理性；而任泽平最大嘅特点就系“煽情”、“忽悠”、“见风就是雨”，又话任泽平只系“很会吹牛”。任泽平加入恒大后，发表一系列“鼓励观点”，壮大许家印嘅胆量，“乾柴遇到烈火，结果可想而知”。
