东网电视
更多新闻短片
黄锦星负责嘅环保政策一镬粥，张国钧闹爆“四电一脑”计划搞到立立乱。(设计图片)
环境局局长黄锦星负责嘅环保政策一镬粥，再次遭行政会议成员带头批评！继行会成员兼饮食界议员张宇人，成功提出中止阻建北区沙岭兴建嘅有机资源回收中心第二期嘅建议，另一名行会成员兼中西区区议员嘅张国钧(Horace)于区议会发功，带头提出讨论文件闹爆已实施逾4个月嘅“四电一脑”计划，形容呢个计划“实施混乱、劣多于优”，佢更表明由于“四电一脑”搞到立立乱，引发好多议员对垃圾征费都好有保留，睇怕黄锦星都要谂吓办法，否则环境局嘅政策推出一项、挨轰一项都唔系办法！
行会成员被视为政府决策核心，有政党背景嘅立法会议员及区议员更有不成文规定，要于议会内为行会通过嘅政策箍票护航，之不过，近年行会成员对于集体负责制各有想法，每隔一段时间就有行会成员带头反对政府政策，近期环境局负责嘅政策系重灾区，先有张宇人于一个多月前，在立法会工务小组出招，闹爆环境局就北区沙岭有机资源回收中心第二期嘅书面回覆答得太迟，并狠批政府有钱都唔应该将公帑倒落咸水海，提出中止议程获得通过，煞停呢个有机资源回收中心第二期继续于议会闯关。
最新一个战场就系去年8月起实施嘅“四电一脑”生产者责任计划，查实地区人士一早发现有大批废电器遭胡乱弃置喺街上同垃圾站，就此，中西区区议会副主席、民建联秘书长陈学锋曾于网上留言“召唤黄锦星局长”跟进，而陈嘅党友更扬言要发起收集街头“四电一脑”送晒去黄锦星办公室。
不过，睇怕民建联呢个反对力度，仲未可令黄锦星领导嘅环境局醒觉，最新就由“三料议员”Horace于区议会出手，联同陈学锋等多名中西区区议员于区会大会，提出名为“不环保的四电一脑”讨论文件，狠批有关计划实施混乱，市民继续贪方便喺街上废置电器，而回收商嘅回收中心更加早已放满旧电器，长时间都未处理，要求当局回应七大问题，包括交代于计划实施前后，于街上收到嘅“四电一脑”数字。
Horace接受查询时批评，黄锦星同环保署太过相信承办商，佢同地区兄弟曾经多次攞出地区个案，有关方面就算发现真有此事，都只系话属于个别例子，实在系同地区情况唔相符。佢又话，虽然自己唔反对今次政策方向，但正如多名立法会嘅同事，都质疑环保署嘅执行能力，资源同部署都唔得，令人觉得有啲眼高手低喎。
就系因为“四电一脑”问题多多，Horace话依家好多议员都对俗称垃圾征费嘅都市固体废物征费好有保留，佢表明，黄锦星日后要畀心机说服大家，否则啲议员冇信心，垃圾征费嘅法案委员会都唔会咁顺利过关。
话时话，黄锦星已非首次畀行会成员带头反对环保政策或项目，佢真系要摄高枕头谂吓，点样可以同佢哋，以致系同关心环保嘅议员可以有良性互动嘞！
