东网电视
更多新闻短片
陆颂雄(左)任铁路事宜小组委员会主席，但畀议员话佢开会次数少。(温国佳摄)
港铁沙中线开通期一拖再拖，加上近期暴力示威者多次毁坏港铁设施，搞到港铁最近都提早收车，以便维修。铁路事宜小组委员会今(5日)开会成功选到正副主席，分别由陆颂雄同陈恒镔担任，陆颂雄随即安排开会时间，但被议员投诉一年得4次会完全唔够，唔通陆想偷懒？
议员林卓廷话沙中线系焦点所在，到依家都未实行局部通车，工程质量、管理营运又出问题，先前红磡站仲出事故添，希望安排多几次会议，可以增加会议工作量又可以凸显重要性。陆就叫林写信申请，但希望先确定例会嘅日子，林就好激动话“同你讲咪得啰，点解要写信，都傻傻哋嘅”。
本来谂住建制派会帮手打圆场啦，点知议员柯创盛问铁路何去何从，希望陆颂雄对政府“穷追猛打”，迫运房局交代沙中线问题。就连啱啱当选做副主席陈恒镔都要求开会开密啲，以回应社会诉求。
陆颂雄回应话明白今届铁路事宜小组委员会有好多嘢要跟进，会尽量安排时间，包括加会或者加长会议时间，同时会迫港铁、运房局交代相关事宜，例如要求政府畀时间表亦都会问沙中线独立调查委员会拎报告。佢仲强调自己冇偷懒，每个委员会都跟机制运作，惟有喺机制外搵时间加会啦！
