东网电视
更多新闻短片
丘文俊(右一)寻日同一班前区议员饮酒聚会。
1/2
自从旧年政府要求区议员以及公职人员宣誓，唔少区议员都自己请辞或者被取消议员资格，疑踩红线嘅前区议员选择离港前往外国亦大有人在。曾协办初选票站、被廉政公署通缉涉煽惑他人不投票或投白票嘅沙田前区议员丘文俊，旧年年中流亡英国伦敦，佢寻日分享同一班前区议员饮酒聚会嘅照片，有身处台湾嘅前区议员留言笑指可以开流亡区议会，仲有网民发现当中有唔少系通缉犯添！
丘文俊喺旧年年中流亡英国，初时都唔系好适应到，曾称身处异乡感到好孤寂，有时谂唔通就好想喺高山断崖绝壁一跃解忧，但睇嚟佢依家应该唔想跳崖喇！事关佢寻日喺Facebook贴文，同一班朋友一齐“围炉”聚会，饮下酒，吹下水咁喎。照片由丘文俊揸机自拍，当中仲有几位前区议员曾杰、刘珈汶、李轩朗、何志宏同埋李俊威等人添，枱面上有9支酒同埋多个酒杯，9个人饮9支酒，唔怪得佢哋众人都饮酒饮到脸红红咁啦。
贴文引嚟唔少网民留言，其中同样身在英国嘅前区议员王卓雅就留言话聚会无佢喎，而丘文俊都叫佢下次嚟参加；而身处台湾嘅荃湾前区议员赖文辉就话“英国真热闹，可以开流亡区议会”，仲有网民留言指聚会入面有成堆通缉犯啊！
其实话有成堆通缉犯都无讲错㗎，因为相入面嘅刘珈汶、李轩朗同丘文俊都正被廉署以煽惑他人在2021年立法会换届选举中投白票及不投票通缉，而裁判法院都签发咗手令通缉佢哋归案，而睇返廉政公署网站上嘅被通缉人士列表，几位喺预设排序上都算名列前茅㗎。
而日前丘文俊都曾经贴文讲佢哋被通缉一事，只见3人围住一部手提电脑，电脑显示廉署嘅通缉犯页面，3人指住部电脑笑得好开心添，而丘文俊仲话自己张相畀电脑拉到块脸好长，问廉署可唔可以帮佢整得靓仔啲喎。同日曾杰亦都有贴出同一张照片，仲标注埋行政长官林郑月娥同埋廉署嘅Facebook帐号，称自己已经捕获3个香港通缉犯，叫廉署佢哋私讯自己倾下点样交收咁话喎。
讲到咁寸嘴，唔知佢哋敢唔敢返香港？
丘文俊、刘珈汶同李轩朗都正被廉政公署通缉。
