东网电视
更多新闻短片
迈向男人40嘅陈岳鹏，对于“转字头”充满期待。
人大一岁，又老一年，即使话“年轻人”嘅定义愈来愈阔，但一去到“四十而不惑”嘅年纪，无论点讲人生都已经过咗一半。寻日(14日)迎来四十岁生日嘅政制及内地事务局前副局长陈岳鹏，就似乎无意认老，仲喺社交平台细数过去种种经历，指人生上半场过得好充实，对于“转字头”充满期待咁话。
常言道“人生如戏”，陈岳鹏枚举人生上半场曾充当嘅社会角色，由童年读书做学生哥开始，课馀参加童军、搞班会，跟住留学、实习、参选区议会、进身官场、之后再进修、任职马会、近年就爱上体育运动。佢话不停探索每种角色，可谓绝无冷场，仲好自豪咁讲：I have lived my life to the full(人生过得非常充实)！又话感恩上帝对佢不薄，加上亲朋同师长嘅支持同鼓励，令佢有勇气去尝试，有力量去做一个更好嘅自己。
穿上2019年乐施毅行者“战衣”嘅陈岳鹏，一手捧住生日蛋糕，一手举起4只手指，话自己之前嘅四个十年，一个比一个特别，一个比一个有趣，所以佢肯定更精彩嘅好戏，还在后头。照佢咁讲，莫非预告人生舞台将另有新角色？
