同球迷開片有手尾 達雲紐尼斯面臨被罰全球停賽
2024年07月12日 13:03
東網電視
更多新聞短片
達雲紐尼斯(右)擺出一副拳擊手姿態，想同球迷「隻揪」。
上場美洲國家盃4強賽後，發生烏拉圭球員同對手哥倫比亞球迷衝突事件，根據英國《太陽報》爆料，有份參與衝突嘅烏拉圭前鋒達雲紐尼斯、中場賓坦古亞，面臨被國際足協秋後算帳，一旦罪成，將可能被判罰全球停賽，意味2人可能錯過新一季英超季初賽事。
當時有哥倫比亞球迷出言辱罵，並用啤酒淋烏拉圭球員家人，於是球員走去觀眾席保護家人，當中以達雲紐尼斯最激動，擺出一副拳擊手姿態，想同球迷「隻揪」，至於賓坦古亞向人群掟水樽，過程被電視台影低。
雖然達雲紐尼斯、賓坦古亞行為出於保護家人，但國際足協表明唔會容忍任何暴力行為，涉事球迷固然責無旁貸，達雲紐尼斯、賓坦古亞出手亦面臨處罰，一旦罪成被判全球停賽，唔只國際賽需要「坐波監」，球會賽事都唔踢得。
達雲紐尼斯、賓坦古亞分別效力利物浦、熱刺，新一季英超將於8月17日凌晨開鑼，至於2人會唔會缺席季初賽事，就要睇國際足協判決。
此外，南美洲足協公布，將會對達雲紐尼斯、賓坦古亞、荷西基文尼斯、馬泰斯奧利華拉等11位烏拉圭球員展開調查，但佢哋仍然可以參加美洲盃季軍戰對加拿大。
【延伸閱讀】達雲紐尼斯保護家人 同哥倫球迷開大片