东网电视
更多新闻短片
卢卡文为阿特兰大立过唔少大功。(Getty Images)
意甲劲旅阿特兰大喺欧联附加赛出局后，再爆出内乱丑闻。教练加斯柏连尼喺输畀布鲁日后，公开批评卢卡文系“最差12码刽子手”，呢位尼日利亚前锋随口发出声明，声称被言论深深伤害。据报卢卡文同阿特兰大已经反面，夏天离队事在必行。
阿特兰大喺附加赛次回合对布鲁日，上半场连失3球，卢卡文下半场闪电追番1球后，本来仲有12码机会，但卢卡文操刀被救出，估唔到赛后被加斯柏连尼无情指责：“卢卡文系我见过最差嘅12码刽子手，就连练习嘅纪录都好恐怖，咁紧张嘅时刻佢唔应该操刀，但佢当时入完波之后心雄，我真系唔锺意佢嘅行为。”
卢卡文之后喺社交网反击：“好遗憾要喺输波后发呢段声明，我同阿特兰大以及呢个城市一齐成就好多事，但咁样畀人捉出嚟指责，令我深深感受到伤害同不被尊重......比赛期间，负责操刀嘅球员指示我去处理，为支持球队我亦负起责任。生命系要将痛苦转化为力量，我会继续去做。”
转会权威Fabrizio Romano报道，阿特兰大本来已计划畀卢卡文夏天离队，计划亦唔会改变，呢位前锋上年几乎转投巴黎圣日耳门，但最终转会费倾唔掂而留队。传闻爱华顿、富咸同RB莱比锡都有意招揽佢加盟。
