东网电视
更多新闻短片
安东尼哥顿冲动铸成大错。
纽卡素喺周日(2日)英足杯第5圈，主场1比2输畀白礼顿，无缘晋级8强。相比起出局，安东尼哥顿冲动打人食红牌就更大件事！事关佢按例将会停赛3场，错过今个月中对利物浦嘅英联杯决赛。
纽卡素22分钟由阿历山大伊沙克射入12码领先，但完半场前被恩古巴明泰扳平。踢到83分钟，安东尼哥顿同云赫基斗抢争输，安东尼哥顿疑不满对方拉衫，即“双龙出海”打落对方面部，结果被逐离场。
白礼顿喺补时亦有兰普堤两黄一红被逐，加时战10个对10个之下，白礼顿由韦碧克喺114分钟突破越位射入致胜球，带领白礼顿赢2比1。由于安东尼哥顿嘅红牌属暴力犯规，按例会停赛3场。
纽卡素领队艾迪侯域赛后表示：“我睇唔到哥顿当时嘅意图，但以我对佢嘅认识，佢肯定佢唔系有心伤人。老实讲，我原本冇为意佢会喺(英联杯)决赛停赛，如果系真就更加失望，我哋会再分析事件，保留上诉嘅权利。”
