东网电视
更多新闻短片
尼马同阿妹感情深厚。
上个月重返山度士嘅巴西球星尼马，回流后一直表现唔错，仲入选埋新一期巴西国家队，不过周一(10日)对哥连泰斯因伤缺阵，就引起外界关注，事关3月11日系佢最痛锡细妹Rafaella嘅生日，再次应验坊间流传嘅“射波庆生日”阴谋论，统计显示过去11季，尼马有9季都喺阿妹生日周缺阵。
尼马喺缺席对哥连泰斯后，发声明表示大腿不适唔可以上阵。有传媒统计过，尼马自2014/15球季开始，近11季入面有9季都喺“阿妹生日”嗰阵缺阵，当中包括2次停赛同7次养伤。众所周知尼马同细妹感情极佳，互相有对方嘅纹身喺身上，有阴谋论指尼马过去喺欧洲搵食，都会诈伤或故意停赛，令佢有时间飞返巴西同阿妹庆祝。
呢个阴谋论一直系球迷“吹水”话题，但原连球员都有所闻，西班牙球星沙治奥拉莫斯过去就曾经讲过：“我想同伟大球员合作，尼马系其中之一，不过先要倾下佢阿妹生日个问题。”尼马今次缺阵，仲有另一个阴谋论出现，有球迷质疑山度士系帮尼马留力踢巴西国家队，教练卡辛夏回应：“我冇理会巴西队，尼马系不适并唔算受伤，我只系唔冒险，防止问题出现。”
