东网电视
更多新闻短片
曼联同曼城青年军球员涉“报细数”。
英超“曼市双雄”卷入球员年龄造假丑闻！据英国《每日电讯报》报道，曼联同曼城合共6名由国外加盟嘅青年军球员，被怀疑“报细数”参加唔相等年龄层赛事，当中3人仲入埋英格兰青年军。英格兰足总已接获相关资料，将会对两间球会展开调查。
据报6名涉案球员都唔喺英国出世，近几年先至搬去英国，其中3人更顺利进入英格兰青年梯队，不过最近就有关于呢啲球员嘅资料同影片流出，发现佢哋喺嚟英国之前，已经踢紧更高年龄层嘅比赛。英格兰足总已收到资料，但未有证据证明曼联同曼城知悉实际情况。
虽然报道未有“开名”，不过有报道指其中3名球员，分别系曼联嘅巴斯路尼高图同杜卡尼高图“兄弟兵”，以及曼城嘅威廉古基，3人都系喀麦隆出生，虽然依家注册U14级别，但系6年前已经喺非洲踢紧U15比赛，照推断依家可能已经系“成年人”。
尼高图兄弟被视为曼联青年军最有潜力嘅新星，巴斯路尼高图系10号球员，今季录得入波同助攻双位数，被称为“新史高斯”，获睇好3至4年内可以升上一队。《每日电讯报》报道，唔少曼联青年军嘅家长都表示，担心自己细路要同“成年人”比赛会有更高受伤风险。
尼高图兄弟嘅青年军表现超班。
曼联同曼城未有对指控作出回应，不过曼联就发声明强调：“我哋青年军营运会全面遵守法规，包括物色同注册球员，亦会为所有青年球员嘅健康发展负责。”有经理人指唔少年轻球员，都会被家长或经纪利用做搵钱工具，尤其如果得到英超豪门合约，将会得到可观收入。
