东网电视
更多新闻短片
周五(21日)凌晨欧国联8强首回合，丹麦爆冷喺主场1比0击败葡萄牙，入球者更加系啱啱先打破21场入球荒嘅海伦。呢位曼联前锋连续2场入波后“一朝得志”，竟然当住C朗拿度面前做出对方招牌“Siu”庆祝动作，要无奈嘅C朗叉住腰睇佢表演，而海伦赛后解释自己只系“致敬”，并冇挑衅意图。
主场出击嘅丹麦形势占上风，早段已有多次入肉埋门，24分钟基斯甸艾历臣射门省中对方只手，但佢亲自主射12码被迪奥高哥斯达扑出。去到79分钟，丹麦一次反抢后美妙组织，海伦接应安达斯奥臣传中近门射入，上场英超破入球荒后再有入波，同时打破佢喺国家队1年零5个月入球荒。
海伦射入致胜球之后非常兴奋，更喺C朗面前做出“Siu”庆祝动作，镜头只见到C朗叉住条腰，望住呢位曼联后辈做自己最擅长嘅表演。C朗今场表现淡静，全场只有一次冇威胁嘅头槌攻门，葡萄牙将喺周一(24日)凌晨返主场再斗丹麦，希望可以收复失地。
对于自己嘅庆祝被视为挑衅，海伦赛后解释：“我同世界上最好嘅球员(C朗)交锋，佢系我嘅偶像，而我成为今场致胜球员，个剧本冇得再好啲！我嘅庆祝冇挑衅或其他意思，我一直都话C朗对我嘅足球好重要，对住有C朗在阵嘅葡萄牙对我意义重大。”
