东网电视
更多新闻短片
利物浦向英超冠军迈进一大步。
利物浦向英超冠军全速进发！周四(3日)凌晨“默西赛德郡打吡”，利物浦面对死敌爱华顿近乎暴力嘅踢法，成功克服难关赢1比0，榜首优势再度拉开至12分，馀下8轮赛事只要拎多13分就够捧杯，有望喺今个月提早加冕！
利物浦喺国际赛前接连失落欧联同英联杯，今场打吡战份外肉紧，爱华顿嘅达高夫斯基早段施展“收山脚”，踩向阿历斯麦亚里士打小腿，但球证竟然只出黄牌了事。爱华顿之后有比图比东卡扭过华基尔云迪积克单刀射中柱，利物浦大难不死有后福。
57分钟利物浦前锋迪亚高祖达同路易斯迪亚斯撞墙，祖达再连过两关中路射入。爱华顿尾段愈踢愈唔收脚，补时阶段门将比克福特“抽水”怒踢达云纽尼斯，但球证反而畀黄牌吹停比赛后仍进攻嘅纽尼斯，幸好利物浦最终保住1比0胜果。
利物浦赢波后，领先次席阿仙奴12分，馀下8轮拎多13分就笃定捧杯。最乐观情况系，利物浦未来2仗赢富咸同韦斯咸，阿仙奴就输畀爱华顿同宾福特，咁4月20日就可能成为登基日，当日只要阿仙奴失分或利物浦喺李斯特城身上拎到分，“红军”就会正式封王。
对于达高夫斯基“收山脚”冇食红牌，利物浦领队施洛赛后不满表示：“已经有好多人谈论呢件事，我谂我唔需要再加意见，咁明显嘅事系人都睇到，我宁愿花时间讲下迪亚高祖达嘅入波，同埋居迪斯锺斯嘅出色表现。”
