周二(4日)凌晨國際熱身賽，歐國盃東道主德國迎戰烏克蘭，全場狂轟猛炸有24次攻門，但最終1球都入唔到慘被悶和0比0。德國領隊拿高斯文賽後話滿意球隊表現，並點名大讚後備上陣嘅前鋒麥斯比亞，隨時成為德國秘密武器。<br/><br/>德國今仗強陣出擊，控球率超過6成兼製造24次埋門，但面對烏克蘭嘅密集防線束手無策，最近磅係後備上陣嘅前鋒麥斯比亞，佢入場第1腳就狂抽射中楣底彈出，之後亦有一次具威脅射門被救出，最終兩隊互無紀錄完場。<br/><br/>拿高斯文賽後表示：「我覺得我哋踢咗場好波，當然贏波先係目標，但我哋製造到好多機會，有6至7個黃金機會入波，麥斯比亞踢得好好，我特別開心係班後備球員落場後即時融入。當然球隊仲有地方需要改善，例如要更有侵略性、有更多球員入禁區等等。」