【移民首選】積多福退休地方 馬主劉心暉屬意加國

曾揚威海外一級賽韓國短途錦標，並於杜拜金莎軒錦標跑獲亞軍的香港賽駒「積多福」，昨日馬會公布其退役消息，馬主之一劉心暉今朝來到沙田馬場，視察「招多福」試閘情況之餘，亦專程到苗禮德馬房探望即將離港的「積多福」，爭取與這位老友多啲相聚時間。

「積多福」前年遠征韓國時，劉心暉賽前一連數朝，都會天未光就前往首爾馬場，全程緊貼愛駒操練情況，而每逢「多福」系試閘，劉生好多時都會到場，並走入馬房探班，而最近佢更在「面書」返立「多福」系賽駒專頁，可見佢對賽馬全情投入，亦與名下馬匹建立深厚感情。

對於「積多福」退役，劉生表示感到唔捨得，並有意將此駒運往加拿大頤養天年，因為佢不時會飛去當地探朋友，可以順便探望「積多福」，若然「積多福」被運到新西蘭，可能沒有機會再見。