【一不離二】贏完安騏 聽日輪到安喜

隨住麥菲文喺10月散倉返回澳洲發展，「安」系話事人王忠秣安排旗下馬匹尋謀出路，結果佢向大摩投下信心一票，將「安騏」同埋「安喜」加盟摩廐。難得有呢位資深馬主支持，大摩當然不敢怠慢，落足心機擺明要省招牌，結果佢亦完成任務，上周日嘅香港國際賽，王生女兒王賢敏嘅「安騏」順利轉倉即勝，兼且彈甩上次包Q嘅「威進駒」、「四通八達」，戰鬥力明顯大大提升。

所謂一不離二，既然之前只係入圍一次嘅「安騏」都識贏，今日輪到麥菲文在港從練嘅代表作，同時亦係王生自己名下嘅「安喜」出賽，梗係有餐士。其實贏完「安騏」後，大摩早已爆響口話會安排「安喜」今日上陣，兼且好有信心交出好成績，睇嚟大摩對後駒嘅進度非常滿意。另外，「安喜」前仗若非被告甩，早已贏三班田草1200米，上月尾加盟摩廐首次試泥閘走勢討好，機會樂觀。