全哥有決定 紅衣醒神光榮引退

雖然兩度揚威香港短途錦標，但羅富全訓練嘅短途好手「紅衣醒神」，卻兩度於主席短途獎飲恨，估唔到尋日竟然能以7歲馬身份首次攻下呢場1200米一級賽，殊不容易，難怪原先計劃今仗作為此駒最後一戰嘅全哥，都話要同馬主商量，係咪要安排退役。

不過，經過一晚考慮兼且同馬主顧永祥商量後，羅富全決定讓「紅衣醒神」喺巔峰中光榮引退，今朝佢哋仲搵埋贏馬功臣田泰安一齊同「紅衣醒神」影返一張威水相。全哥話好開心可以喺「紅衣醒神」退役前可以贏多場一級賽，而佢相信馬主會安排此駒去澳洲過退休生活。