東網電視
更多新聞短片
夏天見到汽水機，猶如沙漠發現西瓜。(資料圖片)
呢輪熱到爆，唔係講馬，係講天氣，企喺街一陣都出汗，有部汽水機喺左近，個個都會爭住幫襯。沙田馬場一樣有汽水機，馬迷未必知，不過唔會擺喺公眾席，否則多多都唔夠撳，反而機坪會有一部，做到身水身汗嘅馬伕周時幫襯，依家有得用八達通仲方便，唔使袋大餅，有時練馬師見太陽乾蒸攝記，都會順手撳多幾罐，事關嗰部汽水機嘅擺放位置係攝記禁地。
另外，咪以為騎師要造磅，就唔會幫襯汽水機，其實平時都見佢哋走去撳，最受歡迎係咖啡同可樂，前者可提神兼利尿，亦係東星至愛，至於一樣含咖啡因嘅可樂，有研究指出運動後段飲用，或能對腦部帶來短暫額外刺激，令運動員更有精力衝刺，難怪當年巫斯義試過騎到攰，坐喺馬匹亮相圈角落，舔番幾啖可樂就可繼續上陣。好多年前嘅某朝晨課，有另一位馬房主帥，唔知係咪畀波士省完，定係口渴得滯，見個汽水機冇晒可樂，跟手打去烽火台直線扯晒火投訴，馬會當然冇責任變畀你，可見呢粒續命丹有幾搶手！
初步提供:
第一場9「明德之星」
第四場9「君子精神」
■東星
