達龍駒去埋希斯度！咩好馬都畀佢攞晒！

曾被馬主以至馬迷寄予厚望嘅前昆士蘭打吡冠軍「達龍駒」，失意四歲三關後只贏一場一班賽，上季更是大跌Watt，七戰全部三甲不入，結果呢匹洪祖杭名下馬，今日入紙轉倉，轉去邊個馬房？咪又係去重臨香港的名牌希斯馬房囉！希斯已經有美麗系郭氏包括馬王「美麗傳承」等多駒加盟，另外蕭家法國莊柏德大賽季軍Malotru亦已來投，而遮打盃亞軍「任我行」早前也慕名而來，最新呢匹「達龍駒」聯同早幾日的同主愛爾蘭二千堅尼季軍「駿龍駒」一齊歸隊，希斯一次過收咁多名牌佳駟，叫座力驚人！

退役馬方面，苗廐一對余氏「歡樂神駒」及「開心神駒」，今日都入紙除名，前駒前季三捷，但上季無甚表現，至於後駒則在南非跑過好望角打吡，但到港健康不穩出賽甚少，兩駒退役都不感意外。今日尚有表情王蘇偉賢香港拍賣會470萬處女馬「自由喜」及容天鵬36分「開心計劃」退下前線。