不敵腳患 爭分奪秒因傷退役

早幾日我哋《東網》馬經報道過上季最佳短途馬「爭分奪秒」因為喺月初驗出左前腿懸韌帶內側分支受傷，下月能否衞冕香港短途錦標頓成疑問。估唔到隔咗幾日，「爭分奪秒」練馬師蔡約翰帶嚟一個壞消息，就係經過同馬主研究後，已決定讓呢匹短途好手退役，據悉此駒將會同前廐侶「紅衣醒神」一樣，退役後將會移居澳洲嘅Living Legends牧場。

現年7歲嘅「爭分奪秒」，在港25戰取得10冠8亞6季，只喺上仗角逐女皇銀禧紀念盃跑第五，首次不入三甲，累積獎金達5289萬。據蔡約翰指出，佢一直都安排正常操練畀「爭分奪秒」，但馬兒似乎唔再願意上陣，況且最近驗出有腳患，因此佢唔想再令馬兒受傷，故此作出退役安排。

作為近年其中一匹演出最可靠嘅賽駒，蔡約翰透露即使好難與其他馬匹作比較，但「爭分奪秒」毫無疑問係佢訓練嘅最佳賽駒之一。