澳洲史上第三人 賈傑美贏夠1000W

近期炙手可熱嘅澳洲女將賈傑美，繼上周末喺考菲爾德馬場取得5W後，尋日佢就轉戰維省百肯南(Pakenham Park)馬場，即使早段表現平平，但佢喺最後兩場1400米賽事順利建功，尾場Bermadez更為佢帶嚟第1000場頭馬，令佢成為繼米蓮達(Linda Meech)同埋蓮達（Clare Lindop）後，第3位頭馬數目達一千場嘅女將，賽後佢透露今年只係佢騎師生涯第9年，可以攞到呢個成績，感到難以置信。

不過，日前賈傑美亦作出一個艱難決定，就係放棄3戰全勝嘅新星Ayrton嘅帥印，呢匹3歲馬稍後將會出戰一級賽史德布克讓賽，並被視為大熱門，但由於此駒將配49.5kg(約109磅)上陣，而賈傑美透露自己目前最低負磅為51kg(約112磅)，佢亦不打算造磅，被迫放棄呢匹極具潛力嘅質新馬。