東網電視
更多新聞短片
馬會開季前都會公布多項新猷，今季除咗喺HKJC TV應用程式新增功能之外，喺2022年第2季，將會推出iPhone版Racing Touch。其實，馬會早於2015年率先推出iPad版Racing Touch，其後因應唔少用戶用Android，故馬會再開發Android版Racing Touch。但係點解iPhone版Racing Touch，會延至今季先至推出？
馬會業務拓展及市場執行總監張之杰表示，其實係因為技術原因，因為Racing Touch一開始嘅定位係有好多資料、資訊、睇片段等，所以一開始就做iPad版本，因為iPad熒幕較大，可以確保用戶體驗係最好，所以馬會以iPad版作為試點，然後發現反應唔錯，每個賽馬日都有3至4萬名用戶，所以決定移植到手機版。
張之杰表示數據顯示，用Android系統手機嘅馬迷多過iPhone，加上一直有iPad版Racing Touch，所以馬會先行推出Android版本Racing Touch，其後再研究點樣令iPhone版Racing Touch出得仔細少少。
此外，今季新設「馬會開戶口」應用程式、顧客服務智能助理等更多個人化功能，呢啲功能似乎可以取代昔日場外投注站提供嘅部分服務。與此同時，馬會近年不斷為場外投注站進行翻新工程，係咪代表投注站嘅功能有所轉變？張之杰表示其實係因應唔同地區嘅需要，所以陸續翻新不同投注站，提供更舒適的空間畀顧客，其中，中環士丹利街分店將會首創專為女士而設嘅品牌咖啡室，希望吸引到更多女性顧客。