忠心勇士又爆缸被迫退役 方嘉柏：非常心痛

今朝(16日)沙田馬場舉行8草4泥合共12組試閘，其中第1組1000米草閘，就有方嘉柏馬房「忠心勇士」試閘，本應為香港短途錦標復出做準備，而方嘉柏繼續搵到莫雷拉幫手試閘。

朝早6點25分左右，第1組試閘馬匹魚貫出場，「忠心勇士」繼續成全場焦點，出閘正常沿途唔算快，只見莫雷拉全程小心翼翼，並搵遮擋以免「忠心勇士」用多咗力，最後「忠心勇士」跟隨其他對手，群駒一齊過終點，但過終點後，「忠心勇士」被影到右邊鼻孔有血，由於今次已經係「忠心勇士」第2次流鼻血，所以依例需要強制退役。

方嘉柏非常唔開心，練者表示呢件事令佢覺得好心痛，因為「忠心勇士」呢課閘係輕抒步頭性質，自己喺今日之前都確保佢一切無恙先安排試閘，點知試完返嚟就流鼻血。方嘉柏亦表示自己投放咗唔少心機，循序漸進想養好「忠心勇士」嘅健康，無疑係有壓力，呢啲壓力同埋自己投放嘅心機同時間係好多人都睇唔到嘅嘢，但只係其中一部分。佢亦透露「忠心勇士」將會休息一段時間先至送去外地。

大摩散倉前一個月左右，幕後將「忠心勇士」轉投方嘉柏馬房，練者亦好有心機照料佢嘅健康，如今退役相當可惜。「忠心勇士」服役期間，喺大摩馬房贏得5場頭馬，當中有1場係1200米G2馬會短途錦標。